Ritröð Guðfræðistofnunar - 01.09.2012, Qupperneq 35

Áður en Sigurður Örn hafði lokið doktorsprófi sínu frá Uppsalaháskóla
1979 var hann tekinn að annast kennslu í ritskýringu og hebresku við
skólann. Frá 1973 til 1982 hafði hann kennslu í fyrrnefndum greinum
með höndum, 1975 var hann settur aðjúnkt og lektor 1979. Þar að auki
kenndi hann trúarbragðafræði við Háskólann í Stokkhólmi 1979-1985 og
Trúarbragðafræðaskólann í Linköping 1980-1983. Veturinn 1980-1981 var
Sigurður settur lektor við háskólann í Lundi. Hann leysti Þóri Kr. Þórðarson
af sem settur prófessor í gamlatestamentisfræðum við guðfræðideild Háskóla
Islands frá 1985 til 1988. Áður hafði hann leyst prófessor Þóri af veturinn
1971-1972.
Árið 1988 var Sigurður Örn ráðinn af Hinu íslenska biblíufélagi til að
vinna að því verki sem með réttu má kallast hans opus magnum. Frá þeim
tíma tileinkaði hann vinnukrafta sína þýðingu Gamla testamentisins á
íslensku en Sigurður var aðalþýðandi þýðingar Gamla testamentisins sem
gefin var út sem hluti af nýrri biblíuþýðingu 2007.
Ásamt með þýðingarstarfi sínu sinnti Sigurður rannsóknum og kennslu.
Frá 1985 kenndi hann hebresku við guðfræðideild Háskóla íslands sem
stundakennari en frá 1996 til 1999 var hann ráðinn prófessor í þýðingar-
fræðum við Háskóla Islands með samstarfssamningi Guðfræðistofnunar og
Hins íslenska biblíufélags og hafði þá jafnframt með höndum kennslu í
hebresku við guðfræðideild. Fyrir utan fræðibækur sínar, eða „mónógrafíur“,
ritaði Sigurður kennsluefni um spámenn og sögu ísraels sem og fjölda
greina um hin fjölbreytilegustu efni, bæði trúarbragða- og menningar-
söguleg þemu eins og mannsoninn og vínrækt í Gamla testamentinu annars
vegar sem og vandlega kynningu á óperunni Parsifal eftir Richard Wagner
hins vegar, svo dæmis séu tekin. Er þá ónefnd ástríða hans fyrir ítalskri
sögu og menningu sem leiddi til þess að hann lauk BA-prófi í ítölsku frá
Háskóla fslands árið 2004, þá 72ja ára að aldri! Fjallar lokaritgerð hans um
14. aldar skáldið Francesco Petrarca og ber yfirskriftina Realta velata-svelata
verita nella canzone RVF CXXIXdi Petrarca. Það kemur líklega ókunnugum
spánskt fyrir sjónir að sjá athugasemdina „Ritgerðin er handskrifuð“ við
ritgerðarfærsluna á vef Landsbókasafns Islands - Háskólabókasafns en þeim
sem þekktu hann yljar hún um hjartarætur því hún minnir á eitt af mörgum
einkennum Sigurðar sem gerðu hann svo einstakan sem raun bar vitni. Eins
og framangreind athugasemd vitnar um var Sigurður ekki maður tækninnar.
Hann ók ekki bifreið og hann notaði hvorki ritvél né tölvu við fræðistörf
sín. Allt sem hann skrifaði ritaði hann með penna eða blýanti á pappír,
33