Tímarit Máls og menningar - 01.11.2018, Side 2

2 TMM 2018 · 4
Frá ritstjórum
Það fylgir því sérkennileg blanda af eftirvæntingu og lotningu að taka við
Tímariti Máls og menningar undir lok 79. árgangs þess. Í öll þessi ár hefur
forverum okkar í ritstjórastóli tekist að bjóða lesendum upp á spennandi
blöndu af skáldskap og samfélagsumræðu, og eins og þau stefnum við að því
að Tímaritið endurspegli það sem er efst á baugi hverju sinni, hugi að gras-
rótinni um leið og starfandi skáld og fræðimenn sækist eftir því að birta þar
efni sitt. Við þökkum Silju Aðalsteinsdóttur sérstaklega fyrir að leiða okkur
inn í starfið og ómetanlega aðstoð við þetta hefti.
Þetta hefti geymir fjölbreytt efni eftir þekkta sem óþekkta höfunda, einn
sem fæddur er um síðustu aldamót og aðra sem eiga að baki langan og farsælan
starfsferil. Þess er minnst að hundrað ár eru frá fæðingu Jakobínu Sigurðar-
dóttur og Kristján Árnason, bókmenntafræðingur og skáld, kvaddur; rýnt er
í ljóð Ingibjargar Haraldsdóttur og Allt sundrast, sextuga skáldsögu nígeríska
höfundarins Chinua Achebe en kastljósinu jafnframt beint að glænýjum bók-
menntum. Af samfélagsmálum kennir einnig ýmissa grasa; Leifur Reynisson
rifjar upp róstusama daga í París 1968 með aðstoð sjónarvotta og Unnur
Birna Karlsdóttir fer yfir sögu fasismans og fasískra samtaka hér á landi.
Bæði leggja áherslu á að við nýtum okkur lærdóma fortíðar til að bregðast við
ólgu í alþjóðastjórnmálum og firringu samtímans. Einar Már Jónsson birtir
hér síðustu hugvekju sína að sinni og rétt að þakka honum bráðskemmtilegar
hugleiðingar í undangengnum heftum. Guðmundur Andri Thorsson seilist
í gamla skruddu sem lýsir sérlunduðum persónum úr sveitasamfélaginu á
meðan Lóa Hlín Hjálmtýsdóttir segir frá þeim furðuverum sem urðu á vegi
hennar í Laugardalshöllinni í haust á viðburði sem hún kallar „ættarmót
nördanna“. Í kápumyndinni fangar Lóa stemmninguna í París maí ’68. Þá er
að finna í heftinu fjölbreyttan skáldskap og fleira spennandi efni sem glöggir
lesendur munu taka eftir að á sér ýmsa áhugaverða snertifleti.
Við óskum lesendum góðrar skemmtunar og hlökkum til samfylgdarinnar
við ykkur!
Elín Edda Pálsdóttir og Sigþrúður Gunnarsdóttir
TMM_4_2018.indd 2 6.11.2018 10:22