Ritið : tímarit Hugvísindastofnunar - 01.10.2020, Blaðsíða 87
HJALTI HuGASON
92
dóminn: „Guð“, „Drottinn“ og „Herra“.13 „Jesús“ sem bæði getur verið nafn
og ávarp, jafnvel ákall, kemur þó líklega oftast fyrir.14 Þá er orðið „sonur“
algengt og er þar oftast um son Guðs að ræða.15 Heitið „Kristur“ er mun
óalgengara.16 Orðið „synd“ ásamt afleiddum orðum kemur fyrir hátt í 90
sinnum. Nátengd eru orðin „sekt“ og „sekur“. Sé þeim bætt við kemur orða-
klasinn fyrir í rúmlega 100 skipti. Þá kemur „hold“ fyrir í um 60 skipti en það
er oftar en ekki viðhaft um hinn synduga veruþátt mannsins.17 Loks koma
orðmyndirnar „iðrast“, „iðrandi“ og „iðrun“ ásamt orðum sem af þeim eru
dregin samtals fyrir í rúm 30 skipti. „Huggun“ og „trú“ ásamt sögnunum að
„hugga“ og „trúa“ sem lýsa andstæðu sálarástandi koma fyrir í um 100 skipti.
Þessar tíðnitölur eru vísbendingar um að Passíusálmarnir séu ekki síst
ákalls-, bænar-, játningar- og iðrunarsálmar þar sem ljóðmælandinn ákallar
guðdóminn og játar syndir sínar, iðrun og trú en þakkar jafnframt þá huggun
sem af játningunum hlýst. Sálmana ber því frekar að skoða sem guðrækni-
en guðfræðirit og að þeir séu fremur ætlaðir til íhugunar en fræðslu að svo
miklu leyti sem mögulegt er að greina þar skýrt á milli. Mótar það útlegg-
inguna sem fram kemur í þeim og veldur því að hún er fremur trúfræðileg.
Tölfræði ein og sér hrekkur þó skammt í þessu efni.
Frekari greining á íhugun Hallgríms í Passíusálmunum sýnir að hún er
á persónulegum, innhverfum nótum og fellur að þeirri dulhyggjuhefð sem
gerði vart við sig víða um álfuna undir lok miðalda og á árnýöld og sagði
til sín þvert á kirkjudeildir.18 Hún kom enda fram í ritum Martins Moller
(1547–1606) og Jóhanns Gerhard (1582–1637) sem mest eru talin hafa mót-
að Passíusálmana.19 Í sálmunum er píslardulhyggja eins og vænta má fyrir-
13 „Guð“ kemur 211 sinnum fyrir, „Drottinn“ 156 sinnum og „Herra“ 144 sinnum.
14 261 sinni.
15 74 sinnum.
16 36 sinnum.
17 Samanber hendingar úr „Allt eins og blómstrið eina“: „Adams er eðli runnið / í
mitt náttúrlegt hold, […]“ (sjá síðar). Hallgrímur Pétursson, „um dauðans óviss-
an tíma,“, Passíusálmar, Reykjavík: Landsbókasafn Íslands – Háskólabókasafn, 1996,
bls. 202–205, hér bls. 203.
18 Per Ingesman, „Middelalderen“, Kirkens historie 1, Kaupmannahöfn: Hans Reitzels
forlag, 2012, bls. 309–779, hér bls. 717–746. Carsten Bach-Nielsen, „1500–1800“,
Kirkens historie 2, Kaupmannahöfn: Hans Reitzels forlag, 2012, bls. 17–381, hér bls.
229–232.
19 Mörður Árnason, „Dulúð og íhugun“, Passíusálmarnir, útgáfa og leiðsögn Mörður
Árnason, Reykjavík: Crymogea, 2015, bls. 510–513. Mörður Árnason, „Eintal sálar-
innar – lærdómar og líkingar“, Passíusálmarnir, útgáfa og leiðsögn Mörður Árnason,
Reykjavík: Crymogea, 2015, bls. 32–35.