Ritið : tímarit Hugvísindastofnunar - 01.10.2020, Qupperneq 137
SkÚLI SkÚLASON
142
fyrir að yfirstandandi heimsfaraldur Covid-19 kórónuveirunnar megi rekja
til taumlausrar ágengni, óvarkárni og hugsunarleysis í samskiptum okkar
við vistkerfi jarðar og umhverfið.4 Félagsleg staða einstaklinga og þjóða er
einnig birtingarmynd umhverfisvandans, þar sem alls kyns gróft misrétti
viðgengst, einstaklings- og neysluhyggja grasserar, græðgi ræður för, stríð
geisa og mikill fjöldi fólks er á flótta. Síðast en ekki síst sjáum við uppgang
popúlískra öfgasjónarmiða sem ógna frelsinu og lýðræðinu.
Eitthvað mikið hefur farið úrskeiðis og margir óttast þetta ástand eins
og stóraukin umræða um umhverfismál undanfarin misseri – meðal ann-
ars í fjölmiðum – ber með sér.5 Þessi umræða snertir alla. Börn og ung-
menni mótmæla loftslagsbreytingum, stjórnmálamenn takast á um mögu-
legar lausnir, fræði- og listamenn keppast við að miðla sýn og þekkingu um
mann og umhverfi, náttúruvísindamenn leita bæði skamm- og langtíma-
lausna – oftar en ekki tæknilegra – til að takast á við ástandið og fjölskyldur
og skólakerfið reyna að leggja sitt af mörkum til að upplýsa um hlutina og
hafa þannig áhrif á hegðunina. Þessi viðleitni endurspeglar góðan vilja til
að bæta heiminn og fjölmargar leiðir virðast vænlegar til árangurs. Sjálfbær
þróun í umgengni og nýtingu auðlinda náttúrunnar er ofarlega á baugi og
gjarnan er litið til fortíðar um mögulegar lausnir, til dæmis á landbúnað
fyrri tíma og afstöðu sumra frumbyggjasamfélaga til náttúrunnar. Viljinn
til að gera betur og að láta verkin tala er svo sannarlega fyrir hendi. Það
sést vel á afgerandi viðbrögðum heimsins við Covid-19 faraldrinum þar
sem um er að ræða beina ógn við líf og heilsu okkar mannanna hér og
nú. Eðlilegt er að fólk spyrji hvers vegna viðbrögðin við loftslagsbreyt-
ingum og hruni líffræðilegrar fjölbreytni sem augljóslega ógna ekki síður
líka nýja kvikmynd: David Attenborough. Life on our Planet, leikstjórar Alastair Fot-
hergill, Jonathan Hughes og keith Scholey, Netflix, 2020.
4 Bergljót Baldursdóttir, „Hægt að koma í veg fyrir heimsfaraldra eins og COVID-19“,
RÚV, 19. ágúst 2020, sótt 7. desember 2020 af https://www.ruv.is/frett/2020/08/19/
haegt-ad-koma-i-veg-fyrir-heimsfaraldra-eins-og-covid-19; og Andrew P. Dobson, Stu-
art L. Pimm, Lee Hannah, Les kaufman, Jorge A. Ahumada, Amy W. Ando, Aaron
Bernstein, Jonah Busch, Peter Daszak, Jens Engelmann, Margaret F. kinnaird, Bin-
bin V. Li, Ted Loch-Temzelides, Thomas Lovejoy, katarzyna Nowak, Patrick R.
Roehrdanz, Mariana M. Vale, „Ecology and economics for pandemic prevention.
Investments to prevent tropical deforestation and to limit wildlife trade will protect
against future zoonosis outbreaks“, Science 369/2020, bls. 379–381.
5 Mjög gott dæmi eru sjónvarpsþættir Ríkisútvarpsins á síðasta ári um stöðuna í um-
hverfismálum, Hvað höfum við gert? (2019). Nú er unnið að framhaldsþáttaröðinni
Hvað getum við gert?.