Ritið : tímarit Hugvísindastofnunar - 01.10.2022, Side 95

RAnnVEIG SVERRISDóTTIR OG KRISTÍn LEnA ÞORVALDSDóTTIR
94
um íslenskt táknmál ætti að vera leiðarljós við mótun málhegðunar, mál-
viðhorfa og málstýringar í samfélaginu en ekki síður við myndun málstefna
í formi skjala fyrir stjórnvöld, sveitarfélög og skólastofnanir sem lýsa yfir
áformum þeirra í tengslum við íslenskt táknmál“.93 Í tillögunni eru settar
fram þær fimm meginstoðir eða áherslur sem MÍTM byggir á. Þær eru eftir-
farandi:94
A. Jákvætt viðhorf er kjarni málstefnu ÍTM og grundvöllur jafnra tæki-
færa.
B. ÍTM í máltöku táknmálsbarna er lykillinn að framtíðinni.
C. Rannsóknir á ÍTM skipta sköpum fyrir varðveislu menningarverð-
mæta.
D. Jöfn þátttaka í íslensku þjóðlífi fæst með fjölgun umdæma ÍTM.
E. Lagaumhverfi á að tryggja stöðu ÍTM.
MÍTM felur í sér áhersluþætti innan hverrar meginstoðar og henni fylgir
ítarleg aðgerðaáætlun sem ætlað er að tryggja að markmið stefnunnar náist.
Sú áætlun miðast eingöngu við þær aðgerðir sem koma þurfa til framkvæmda
á þremur árum eftir að MÍTM tekur gildi en gert er ráð fyrir að stefnan
verði endurskoðuð og uppfærð að þremur árum liðnum og aðgerðaáætlun
sömuleiðis. Tiltekið er að afar brýnt sé að hið opinbera, ríki og sveitarfélög
sem og almenningur allur leggist á eitt við framkvæmd og eftirfylgni MÍTM
þar sem ÍTM er mál í útrýmingarhættu.
Í næstu köflum verður rýnt í MÍTM í ljósi málstefnufræða og leitað svara
við því hvort MÍTM stuðli að því að búa til það málumhverfi sem táknmáls-
börn þurfa til að þróa mál sitt og geti þar með haft áhrif á lífvænleika málsins
og komið í veg fyrir útrýmingu þess. Komið verður inn á allar meginstoðir
málstefnunnar þó sjónum verði frekast beint að þáttunum viðhorf, máltaka
og umdæmi en rannsóknum og lagaumhverfi.
Viðhorf
Fyrsta meginstoðin í MÍTM segir að jákvætt viðhorf sé kjarni hennar og
grundvöllur jafnra tækifæra.95 Tungumálaviðhorf þróast út frá málhug-
93 Bls. 2.
94 Bls. 1.
95 Bls. 1.