Andvari - 01.01.1975, Page 69

ANDVARI
FRÉTTABRÉF FRÁ NÝJA-Í SLANDI
67
höfðingja, hvar sem hann átti heima. Sterkur flokksmaður var hann ávallt, en
jafnan skipaði hann sér þar í flokk, er bezt gegndi, og sökum vitsmuna sinna
og sanngirni gætti hann ævinlega hófs í flokksbaráttunni. Kirkju vora studdi
hann af öllum mætti, og eins og skynsemi hans fór sívaxandi allt til dauðadags,
svo varð hann og með ári hverju æ betur og betur kristinn maður.... Ég hefi lengi
um hann hugsað með lotning og ást eins og sannkallaðan „patríarka" í leik-
mannahópi Vestur-íslendinga.“
Séra Birni B. Jónssyni farast svo orð um föður sinn í grein um hann í
Almanaki Ólafs S. Thorgeirssonar 1903:
„Tvennt er það, er mér einkum fannst auðkenna sálarlíf föður míns
sáluga. Það var hugmyndaauðlegð og karlmennska. Vegna þess, hve rík af hug-
myndum sálin var, var hann sérlega skáldlega hugsandi, hafði líka frábæra
skáldskapar smekkvísi og orti sjálfur ekki alllítið, þó sjaldan birti hann skáldskap
sinn. Og vegna þess, hvílíkt andlegt karlmenni hann var, leituðu menn til hans
þráfaldlega í neyð og vanda; hann var svo sterkur og stilltur. En þó held ég, að
eitt hafi einkennt hann mest, og það var hans djúpa, heilaga lotning fyrir guði.
Hana hef ég hjá engum manni þekkt á hærra stigi.“
Engum getum skal að því leitt, hver hefðu orðið örlög Björns Jónssonar frá
Asi í Kelduhverfi, ef hann hefði borið beinin í ættlandi sínu, en af æviferli hans
og ummælum nákunnugra má ljóst vera, að hjá honum hafa farið saman gæfa
og gervileikur. Vissulega fór hann ekki á mis við erfiðleika, en hann óx af hverju
því viðfangsefni, sem lífið lagði fyrir hann.
HELZTU HEIMILDIR:
Almanak Ólafs S. Thorgeirssonar 1903, bls. 77-79 (MinningarorS séra Björns B.
Jónssonar um föður sinn).
Saga Islendinga í Vesturheimi, IV. bindi, bls. 58-61.
Kristján Jónsson: Ljóðmæli, Washington D. C. 1907 (eftirmáli eftir sera Björn B.
Jónsson, bls. 155 - 165, með endurminningum Björns Jónssonar um Kristján bróður sinn,
bls. 159- 163).
Gunnari Sveinssyni skjalaverði á ég að þakka góðar bendingar um heimildir.
B. V.