Uppeldi og menntun - 01.01.2006, Blaðsíða 56

6
hyrninginn. Birna og Gyða kynntu sína mynd næst á eftir þeim. Þær sögðu frá því að
þær hefðu valið þríhyrning og ferning og raðað þeim þangað til þeir tengdust saman
í hring. „Svo kom sexhyrningur inn í“ sagði Birna. Ég spurði þær hvers konar form
þessi hringur væri og þær voru fljótar að átta sig á að formið var tólfhyrningur. Það
vakti strax athygli krakkanna að bæði Stígur og Leifur og Birna og Gyða höfðu teiknað
tólfhyrninga og fyllt þá með þríhyrningum og ferningum þó svo að þau hefðu byrjað
með ólíkar gerðir af marghyrningum. Það spunnust skemmtilegar umræður um þetta
og af viðbrögðum bekkjarfélaganna kom skýrt í ljós hve djúpur skilningur margra
þeirra var á því hvernig marghyrningar geta raðast saman. Flestir notuðu líka heiti
marghyrninganna af miklu öryggi í umræðunum.
Mér fannst ástæða til að fylgja þessu verkefni eftir með enn frekari rannsóknum. Ég
sendi því eftirfarandi verkefni heim með nemendum.
Hellulögn
Nú þarftu að fara í gönguferð um nágrenni þitt og skoða gangstéttir og fleiri
svæði þar sem fólk hefur lagt hellur, t.d. við íbúðarhús, skóla eða verslunar- og
skrifstofuhúsnæði. Hafðu með þér blað og rissaðu upp mynstrið í hellulögninni
(hvernig hellurnar eru í laginu og hvernig þeim er raðað saman).
Teiknaðu í bókina eins nákvæma mynd og þú getur af því sem þú sást. Gott væri
ef þú gætir sýnt tvær til þrjár mismunandi gerðir af hellulögn.
Ef þú ætlaðir að leggja hellur við húsið heima hjá þér hvernig myndir þú þá vilja
hafa þær? Teiknaðu mynd sem sýnir hvernig hellulögnin þín gæti litið út.
Ég ákvað að biðja nemendur fyrst að rannsaka umhverfi sitt til að kanna hvernig
svæði eru þakin með hellum með ólíkri lögun. v­ið þá rannsókn nýttist þeim reynslan
af þakningu með marghyrningum í skólanum. En ég vildi fá þá til að kafa dýpra í við-
fangsefnið og þess vegna bað ég þá um að teikna eigið mynstur. Til þess að geta það
þarf að hafa góða tilfinningu fyrir því sem gerir það að verkum að hægt er að þekja
svæði með formum. Það komu fjölbreyttar lausnir á þessu verkefni. Nemendur höfðu
lagt sig eftir að leita að óvenjulegum hellulögnum í umhverfi sínu. Þeir völdu líka
skemmtilegar hellur í hellulögn sína og röðuðu þeim saman á ólíka vegu. Þegar þeir
kynntu teikningar sínar fyrir bekkjarfélögunum kom aftur í ljós hve tamt þeim var að
ræða um rannsóknir sínar og nota hugtök stærðfræðinnar. Það kviknuðu líka nýjar
hugmyndir og nemendur lýstu því sem þeir sáu í teikningum bekkjarfélaganna.
Mynd Leifs vakti mikla athygli. Hann var tregur til að sýna hana í byrjun því „hún
er svo ljót“, sagði hann. Þegar hann svo loksins fékkst til að sýna teikninguna kváðu
við aðdáunaróp í bekknum og margir stóðu upp til að geta skoðað myndina betur og
lýsa því sem þeir sáu. Það sem gerði myndina svona áhugaverða var að Leifur hafði
speglað hellulögn sína um skálínu og því komu fram þrívíddaráhrif í myndinni. Það
vildu allir fá að skoða teikningu Leifs og bókin hans gekk á milli bekkjarfélaganna
ásamt spegli til þess að þeir gætu skoðað hvernig mynstrið speglaðist. Það spunnust
áhugaverðar umræður um teikningu Leifs og Stígur sagði m.a. frá tölvuforriti sem
AÐ LæRA AF E IG In KEnnSLU