Búnaðarrit - 01.01.1992, Blaðsíða 155
íslenzk bændastétt hefur sýnt þaö fyrr og síðar, að hún býr yfir samstöðu
og styrk til að takast á við slík verkefni. Takist okkur þar vel til, er þess að
vænta, að þessi síðasti áratugur aldarinnar verði ekki síðri þeim, sem liðnir
eru, svo að við aldamótin getum við verið sátt við stöðu okkar og hag. Það
er hlutverk komandi Búnaðarþings að styrkja grundvöllinn að þeirri
framtíð.
Búnaðarþing er sett.
Þá tók til máls Halldór Blöndal, landbúnaðarráðherra. Flutti hann
ýtarlega ræðu um landbúnaðinn og vandamál hans. Eru eftirfarandi atriði
úr ræðu hans tekin úr bókun gjörðabókar þingsins:
Landbúnaðarráðherra „ræddi um nýja stefnu íframleiðslumálum bænda,
sem fylgt hefði verið með búvörusamningi s.l. vor. Þessi stefnumörkun
mundi breyta þróun í íslenzkum Iandbúnaði. Ábyrgðin af framleiðslunni
mundi nú færast á bændur sjálfa. Með búvörusamningnum var ráðgert að
fækka ám um 55 þúsund s.I. haust, en fækkunin náði aðeins 44 þúsundum.
Fyrir vikið m.a. blasir nú við stærri vandi en ella á hausti komanda.
Ráðherra sagði, að með fj árlögum væri ákveðið, að tvær síðustu greiðslur
skv. búvörusamningi færðust yfir á tvo fyrstu mánuði næsta árs ofan í
ákvæði samningsins. Kvaðst hann gera sér ljóst, að með þessu væri gengið á
hlut bænda, en jafnframt, að þetta væri nauðsynlegt vegna ríkjandi ástands í
efnahagsmálum. Ráðherra sagðist hafa falið Sjö manna nefnd að halda
áfram störfum.
Hann vék því næst að evrópska efnahagssvæðinu og GATT-samningun-
um og hugsanlegri aðild Islendinga að þeim. Einn helzti tilgangurinn með
GATT-samningum væri að marka leikreglur um framleiðslu og viðskipti
með landbúnaðarvörur.
Ráðherra rakti samþykkt ríkisstjórnarinnar 11. jan. s.l. varðandi samn-
ingsdrög Dunkels, framkvæmdastjóra GATT. Hann sagði, að þjóðhags-
stofnun ynni að athugun á áhrifum samningsdraganna á landbúnaðinn í
íslenzkum þjóðarbúskap. Hann taldi, þegar á allt væri litið, virtist sem búa
mætti íslenzkum landbúnaði bærileg starfsskilyrði innan ramma hugsanlegs
GATT-samkomulags.
Ráðherrann vék að breytingum í íslenzkum landbúnaði og ræddi í því
sambandi um, að ferðaþjónusta bænda gegndi merku hlutverki. Ráðherra
óskaði að lokum Búnaðarþingi heilla í störfum.“
Forseti þingsins þakkaði ráðherra.
Loks flutti formaður Stéttarsambands bænda, Haukur Halldórsson,
ávarp, og er eftirfarandi útdráttur úr því skráður í gjörðabók Búnaðarþings:
„Ræðumaður sagði, að nú væri mikið rætt um sparnað og aðhald, en liðið
væri á annan áratug frá því, að íslenzkur landbúnaður fór að taka til í sínum
153