Skagfirðingabók - 01.01.1983, Page 37
HARTMANN ÁSGRÍMSSON f KOLKUÓSI
fékk frá henni, og það var óverðskuldað, því til þess hafði ég
ekkert unnið.“
Hartmann Ásgrímsson andaðist í sjúkrahúsi á Akureyri 8. ágúst
1948. Þegar hann var orðinn langt leiddur, gerðu synir hans
ferð til Akureyrar. Þegar þeir komu þangað, var hann farinn, en
gerði þeim boð með hjúkrunarkonu að láta sér ekki verða
sundurorða út af því, sem hann skildi eftir.
Að lokum vil eg vitna í Skagfirzkar æviskrár, umsögn Kolbeins
á Skriðulandi:
„Hartmann var oddviti Viðvíkurhrepps 1910—1919. Neitaði
æ síðan að taka endurkjöri, þótt eftir væri leitað. Ekki gaf hann
kost á sér til annarra né meiri mannaforráða. Var honum vel ljós
sú takmörkun ýmissa manna, er vel reynast á vissum sviðum, að
þeir þrá að komast í hærri metorð en hæfir verðleikum þeirra.
Vildi hann forðast þeirra dæmi. — Hartmann var hæglátur
alvörumaður og gæddur þeim hæfileika að geta vakið hógværa
gleði á vinafundum, þótt sjaldan sæist hann brosa. Sjálfur taldi
hann mestu áhugamál sín landbúnað og bindindi. Að vísu voru
áhugamál hans miklu víðtækari. Hann var ætíð hjálpsamur og
vinum sínum hið mesta tryggðatröll. Hvergi var hann meðal-
maður.“
Helztu heimildir:
Skagfirzkar æviskrár, Ættir Skagfirðinga, Sveitarbækur Viðvíkurhrepps, ýmis
skjöl Skagafjarðarsýslu, verzlunarbækur Kolkuósverzlunar, Sigurmon Hart-
mannsson, Jónína Antonsdóttir, Marteinn Steinsson og ýmsar munnlegar
heimildir.
35