Skírnir - 01.01.1969, Side 175
SKÍRNIR
ÞINGVALLAFUNDUR 1888
169
eru kjörskrár meðal kjörgagna, og voru kjósendur til Alþingis þar
268, en 177 eða 66,04% tóku þátt í kosningum kjörmanna. Úr tveim
þeirra hreppa, sem kusu kjörmenn, Skriðuhreppi og Glæsibæjar-
hreppi, vantar kjörskrár, en í kjörbréfi kjörmanna úr Skriðuhreppi
segir, að rúmlega 30 atkvæðisbærir bændur hafi sótt kosningarfund,
og undir kjörbréf kjörmanna úr Glæsibæjarhreppi skrifa 22 bændur.
Kjörmaðurinn úr Akureyrarkaupstað var kosinn með einkennileg-
um hætti. Kjörbréf gáfu honum sex kosningarbærir Akureyringar,
eftir að fellt hafði verið með 12 atkvæðum gegn 5 á ahnennum
kj ósendafundi í bænum að kjósa fulltrúa á kjörfundinn. Á Akureyri
voru kjósendur til Alþingis 28. Kjörmaður Akureyringa kosinn
með þessum hætti var Friðbjörn Steinsson, sem eins og fyrr segir
var kjörinn á Þingvallafund. Mér er ekki kunnugt um kjósendafjölda
Eyjafjarðarsýslu 1888.
Á kjörfundinum var stjórnarskrármálið fyrst á dagskrá, og segir
í fundarskýrslunni, að „meirihluti fundarins“ hafi eindregið látið
„þá ályktun sína í ljós, að halda því máli fram“. Þá var rætt um
gufuskipaferðirnar, „og voru fundarmenn almennt á þeirri skoðun“,
segir í fundarskýrslunni, „að þær þyrftu að komast aftur í betra
horf en nú er“. I skatta og tollamálum hallaðist fundurinn fremur
að óbeinum sköttum en beinum og vildi, að af væri numinn ábúðar
og lausafjárskattur.
Eins og fyrr segir var Grímseyj arhreppur einn þeirra hreppa,
sem ekki sendu fulltrúa á kjörfund á Akureyri. En í kjörgögnum úr
Eyjafjarðarsýslu er bréf til Friðbjarnar Steinssonar, dagsett 18. júlí
og undirritað „Nokkrir Grímseyingar“, svar við glötuðu bréfi Frið-
bjarnar „til forstjóra sveitarfélags Grímseyinga“, þar sem hann
hefur spurt um skoðanir eyjarskeggja á þjóðmálum. Bréfritarar
lýsa fylgi sínu við sjálfstæðismál þjóðarinnar og gefa Friðbirni
Steinssyni „skýlausan rétt“ til að tala einnig í sínu nafni á fyrir-
huguðum Þingvallafundi.
Fyrir Suður-Þingeyjarsýslu var kosinn á kjörmannafundi að
Ljósavatni 13. júní Pétur Jónsson, bóndi á Gautlöndum, með 17
atkvæðum af 18 er greidd voru. Varafulltrúi Sigurður Jónsson,
bóndi á Yztafelli, kosinn með 9 atkvæðum.
Kjörmenn, 20 að tölu, höfðu verið kosnir í öllum sjö hreppum
sýslunnar, þrír fyrir hrepp nema fyrir Húsavíkurhrepp aðeins tveir,