Ritið : tímarit Hugvísindastofnunar - 01.01.2020, Blaðsíða 75
KATLA KJARTANSDóTTIR Og KRISTINN SCHRAM
74
samúð með hvítabirninum en einnig háði sem beinist að tilkalli Íslendinga
til hvítabjarnarins sem hluta af ímyndasafni sínu.
Auknar vinsældir hvítabjarnarins í hvers kyns framsetningu á landi og
þjóð má tengja við hlutverk hans í orðræðu loftslagsbreytinga og annarra
ógna sem steðja að viðkvæmum vistkerfum. Ímynd hvítabjarnarins er víða
notuð til að vekja athygli á aðstæðum svæðisbundinna hópa á norðurslóðum
og reyndar stundum gegn vilja þeirra. Áskoranir hvítabjarnarins í bráðnandi
vistkerfi skírskota ekki síður til orðræðu norðurslóða en loftslagsváar um
allan heim. Hvítabjörninn sem tákn býður því upp á margvíslegar túlkanir
í bæði staðbundnu sem alþjóðlegu samhengi.74 Í íslensku samhengi stað-
setja þessar frásagnir, og það sem kalla mætti leik að efni, landið innan orð-
ræðu norðurslóða og varpa, eins og Auðun hinn vestfirski, óræðum gildum
á hvítan feld hins framandi hvítabjarnar.
Lokaorð
Í greininni höfum við fjallað um tvær tegundir dýra, lunda og hvítabirni,
sem eiga margt sameiginlegt en eru líka mjög ólík. Við höfum rætt um fjöl-
breytilegar birtingarmyndir þeirra, í margvíslegu menningarlegu samhengi,
og lagt áherslu á hvernig þau hafa verið virkjuð sem táknmyndir norður-
slóða en einnig sem eins konar holdtekjur fyrir þá alþjóðlegu umhverfisvá
sem bæði mannfólk og dýr þurfa nú að takast á við. Í því samhengi má nefna
að lundinn hefur nýlega verið skráður á alþjóðlegum válista yfir fuglateg-
undir í bráðri hættu, þar sem hann er settur í flokk með fleiri íslenskum
fuglum á borð við fjöruspóa og skúm.75 Þannig að þó svo lundinn sé iðulega
settur fram sem eins konar dúlla eða krútt, í sambandi við ferðamennsku eða
annað, má einnig líta á hann sem tákn fyrir viðkvæmt sameiginlegt vistkerfi
og þær áskoranir sem við stöndum frammi fyrir í þeim efnum. Rétt eins og
geirfuglinn getur hann vakið upp knýjandi spurningar í tengslum við það
hvernig ofnýting getur leitt til útrýmingar.76 Eins og rætt hefur verið um hér
74 Lill Rastad Bjorst, Arktiske diskurser og klimaforandringer i Grønland. Fire (post) hu-
manistiske klimastudier, Kaupmannahöfn: University of Copenhagen, 2011.
75 „Válisti fugla“, vefslóð Náttúrufræðistofnunar Íslands, sótt 18. nóvember 2019 af
https://www.ni.is/midlun/utgafa/valistar/fuglar/valisti-fugla.
76 Umræðu um táknræna merkingu geirfugla má t.d. sjá í: Katla Kjartansdóttir, „The
changing symbolic meaning of the extinct great auk and its afterlife as a museum
object at the Natural History Museum of Denmark“, Nordisk Museologi, 2/2019,
ritstj. Brita Brenna, 41–56.