Ritið : tímarit Hugvísindastofnunar - 01.01.2020, Blaðsíða 248
„ALLSKONAR NÚTÍmAHELVÍTI“
247
Skáldskaparfræði Brechts voru með öðrum orðum í uppreisn gegn raun
sæisleikhúsinu, sem hann rakti jafnan til Aristótelesar, en leikhúshefð þessa
vildi Brecht kenna við þær formgerðir samfélagsins sem síðar var tekið að
ræða um sem „hugmyndafræðileg stjórntæki“.65 „Harmleikurinn sem kúg
unarkerfi“, eins og Augusto Boal, innblásinn af Brecht, orðaði það.66 Til
finningalega þeysireiðin í átt að hinum harmrænu endalokum, þar sem „ka
þarsis“ eða hreinsun (gr. κάθαρσις) átti sér stað, var í þessum skilningi form
valdbeitingar og stýringar. Hreinsunin er hér túlkuð sem eins konar inngrip
í þágu valdhafa í hugræn ferli áhorfenda, sniðið til þess að vinna úr hættu
legum hugmyndum í formi tilfinningalegrar útrásar og veita þeim þannig
jafnframt útgönguleið, búið er að hleypa gufunni af og tepotturinn er hættur
að blístra.67
Halldór Laxness lét aldrei í ljós skoðanir um sín leikrit sem talist geta
áþekkar þessum. Pólitíska trúin er tekin að veikjast á sjötta áratugnum þegar
Silfurtúnglið er skrifað, og hvað hinn opinbera umræðuvettvang varðar er
hún með öllu horfin á braut þegar að síðverkunum þremur kemur. En þeir
Brecht eiga það sameiginlegt að hafna raunsæi í leikritun og vel kann að
vera að Laxness hafi haft Brecht í huga við ritun leikritsins um Lóu, líkt
og mörgum hefur þótt sennilegt. mikilvægustu tengslin milli leikhúskenn
inga Brechts og fagurfræði Silfurtúnglsins er þó að finna á öðrum og heldur
óvæntari stað, og er þar vísað til úrvinnslu Halldórs á hefðum melódramans.
Þegar fjallað verður um greinafræðilega staðsetningu lokahluta Silfurtúngls-
ins gefst líka ráðrúm, með örlítið stríðum leshætti á skáldskaparfræðum
Brechts, til að fjalla nánar um hvernig framandgervingarfagurfræði epíska
leikhússins á sér hliðstæðu í íslenska leikverkinu. Fyrst er þó nauðsynlegt að
staldra í augnablik við eðli og einkenni þessarar greinar sem svo oft mætir
vanþóknun og þykir jafnvel hálfgerður úrtíningur í stigveldi listanna.
65 Vísunin í stjórntæki á rætur að rekja til Louis Althussers og greinar hans „Hug
myndafræði og hugmyndafræðileg stjórntæki ríkisins (rannsóknarpunktar)“ sem
finna má í íslenskri þýðingu Egils Arnarsonar í Af marxisma, ritstj. magnús Þór Snæ
björnsson og Viðar Þorsteinsson, Reykjavík: Nýhil, 2009, bls. 175–228. Varðandi
kenningar Brechts þessa efnis sjá, john j. White, Bertold Brecht’s Dramatic Theory,
New York: Camden House, 2004.
66 Augusto Boal, „Theater of the Oppressed“, Theater/Theory/Theater, ritstj. Daniel
Gerould, New York: Applause Theater & Cinema Books, 2000, bls. 464–473, hér
464.
67 john j. White, Bertold Brecht’s Dramatic Theory, bls. 84–121 og 225–231.