Ritið : tímarit Hugvísindastofnunar - 01.01.2020, Blaðsíða 178
BANI BOðBERANS
177
til landsins, þar af tuttugu og sjö frostaveturinn mikla 1917–1918. Mest var
af hvítabjarnaheimsóknum veturinn 1880–1881 þegar sextíu og þrjár heim-
sóknir voru skráðar. Frá upphafi byggðar á Íslandi hafa yfir fimmhundruð
hvítabirnir heimsótt landið í tvöhundruð og fimmtíu heimsóknum.7
Fréttir af komu hvítabjarnarins á Þverárfjalli bárust flestum landsmönn-
um í gegnum Ríkisútvarpið. Fjöldi fólks þyrptist á staðinn til að sjá björninn,
ómögulegt var að girða svæðið af með svo stuttum fyrirvara sem skapaði
hættuástand og gerði lögreglunni erfitt fyrir um öryggisgæslu. Í ofanálag var
þoka talin yfirvofandi. Samanlagt leiddu allir þessir þættir til þess, að því að
sagt var, að ákvörðun var tekin um að fella dýrið. Heimsókn hvítabjarnarins
kom á óvart því komið var fram í júní og samkvæmt Veðurstofu Íslands var
enginn hafís í nágrenni landsins. Gervihnattamyndir af svæðinu sýna að
næsti hafís var um sjötíu sjómílur í burtu. Þetta var staðfest af Landhelgis-
gæslunni sem fór í sérstaka flugferð skömmu seinna eða hinn 18. júní 2008
til að kanna hafís umhverfis landið.8 Gögn eru til sem styðja þá kenningu að
hvítabirnir geti synt 100 km á 11 klukkutímum en það ýtir undir þá tilgátu
að hvítabirnirnir tveir sem komu í Skagafjörð hafi synt frá þeim hafís sem
var næstur landi eða í um 129 km fjarlægð.9 Í tengslum við það sem átti sér
stað á Þverárfjalli veltu margir fyrir sér að í stað þess að skjóta björninn hefði
mátt fanga hann og koma honum til baka til síns heimalands. Ekki voru allir
á einu máli um það en í ljósi svipaðra aðstæðna í borgum eins og Churc-
hill í Norður Kanada og á Svalbarða í Norður Íshafinu, þar sem hvítabirnir
eru fangaðir og fluttir í burtu, er eðlilegt að vöngum sé velt yfir aðferðum
hérlendis við komur hvítabjarna. Sér í lagi má huga að breytingum þegar
höfð er í huga yfirvofandi útrýmingarhætta og skyldur þjóða gagnvart þeim
verum sem deila með okkur heimahögum og/eða nágrenni þeirra.
Tveimur vikum eftir komu (og aflífun) hvítabjarnarins á Þverárfjalli var
tilkynnt um hvítabirnu á sama svæði en í þetta skipti var hún á skaganum
sjálfum við bæinn Hraun. Ung heimasæta á bænum, Karen Helga Steins-
dóttir, var fyrst til að koma auga á dýrið. Hún var á leið sinni frá húsinu
að hlöðunni og tók eftir undarlegri hegðun heimilishundsins. Hún fylgdi
7 Ævar Petersen og Þórir Haraldsson, „Komur hvítabjarna til Íslands fyrr og síðar“,
Villt íslensk spendýr, ritstjórar Páll Hersteinsson og Guttormur Sigurbjarnarson,
Reykjavík: Hið íslenska Náttúrufræðifélag og Landvernd, 1993, bls. 74–78, hér bls.
76.
8 „Haf- og borgarístilkynningar 2008“, Veðurstofa Íslands, sótt 2. apríl 2020 af http://
www.vedur.is/hafis/hafistilkynningar/2008.
9 Páll Hersteinsson, „Spendýr á norðurslóðum“, Undur Veraldar, ritstjóri Þorsteinn
Vilhjálmsson, Reykjavík: Heimskringla, 1998, bls. 89–106, hér bls. 92.