Tímarit Máls og menningar - 01.03.2014, Side 2

2 TMM 2014 · 1
Frá ritstjóra
Svanhildur Óskarsdóttir sem starfar á Stofnun Árna Magnússonar spyr
óþægilegra spurninga í grein sinni hér í heftinu um raunveruleg viðhorf
Íslendinga til menningararfsins eftir að hafa fylgst með og tekið þátt í
miklum fagnaðarlátum í tilefni af 350 ára afmæli handritasafnarans Árna
Magnússonar, sem forðaði ómetanlegum handritum frá eyðileggingu með
því að flytja þau héðan og til Danmerkur. Ýmislegt af því sem Svanhildur
rekur í grein sinn bendir til þess að enn eigi Íslendingar nokkuð í land með
að sýna í verki að þeir skilji fyllilega hvað þeim er trúað fyrir að varðveita og
rannsaka eða meti í reynd þær gersemar sem hér voru skapaðar, hvað sem
líða kann hátimbruðu tali um svonefnda þjóðmenningu.
Sú þjóðmenning ber líka á góma í grein Úlfhildar Dagsdóttur um hasar-
hetjurnar Þór, Loka og Sif og kallast skemmtilega á við hugvekju Svanhildar.
Það gerir raunar líka ýtarleg grein Hannesar Lárussonar um Íslenska bæinn
– íslensku torfbæjararfleifðina sem Hannes hefur rannsakað um langt
árabil.
Og er þá fátt eitt talið af fjölbreyttu efni þessa fyrsta heftis ársins. Vert
er að vekja sérstaka athygli á sögu eftir Erlu Þórdísi Jónsdóttur sem fannst
í fórum hennar að henni látinni og dóttir hennar, Þórunn Erlu Valdimars-
dóttir tók til handagagns eins og ýmislegt fleira, svo að úr varð bók sem vakti
verðskuldaða athygli nú fyrir jól, Stúlka með maga.
Guðmundur Andri Thorsson
Athugasemd
Í grein sem ég skrifaði í TMM 2. 2013 er því haldið fram að Róbert Marshall og Jóhann
Hlíðar Harðarson hafi samið við yfirstjórn 365 á undan öðrum fréttamönnum í endur-
skipulagningu árið 2003. Þetta skrifaði ég eftir bestu vitund en Róbert og Jóhann hafa
tjáð mér að þetta sé ekki rétt. Leiðrétti ég því þetta atriði og bið þá afsökunar á þessu
ranghermi.
Árni Snævarr