Tímarit Máls og menningar - 01.03.2014, Side 42

42 TMM 2014 · 1
Jón Óskar Sólnes
Náttganga í stríðsmyrkri
Þegar Norðurlandabúarnir yfirgáfu veitingastaðinn og röltu eftir tröðinni
að A9-þjóðveginum áttuðu þeir sig á því að ekki var lýsing bara af skornum
skammti fyrir utan húsakynnin, heldur var hún hreint engin við götuna. Þar
var niðamyrkur. Monsúnskýin sáu til þess að ekki vottaði fyrir tunglskini.
Þegar þeir gengu til norðurs og fjarlægðust veitingastaðinn var náttmyrkrið
orðið svo svart að þeir sáu bókstaflega ekki handa sinna skil. Þeir höfðu
komið akandi en hugðust ganga heim því að þetta hafði virst stuttur spölur
á jeppanum. Nú var hins vegar dimmt og óvíst hversu lengi tæki að arka að
afleggjaranum niður að svæðisskrifstofunni. Aðkomumennirnir reiddu sig
á ungan nýliða sem sagði að þeir hlytu að finna þetta, náttstaðurinn væri
handan við hornið.
Leið svo og beið en þegar þeir höfðu gengið í nærri hálftíma voru gestirnir
farnir að ókyrrast og fullyrtu sumir að þetta gæti ekki hafa verið svona langt.
En bærinn var algjörlega myrkvaður og þeir höfðu ekki hugmynd um hvort
þeir höfðu gengið of langt eða of stutt. Stundum urðu þeir varir við ein-
hverja hreyfingu í myrkrinu – það gátu verið þöglir heimamenn á heimferð,
hundar eða stórar og miklar rottur. Þá voru snákabit algeng hér um slóðir
sem gerði ekki næturgönguna ánægjulegri. Diplómatinn var ekki lengur eins
kurteis og áður og var reyndar orðinn fremur fúll og heyrðist tauta ýmis vel
valin orð um strákinn sem fór fyrir þeim og skildi reyndar ekki neitt nema
tónfallið. Ákveðið var að snúa við. Enn var gengið drykklanga stund þar til
sást móta fyrir ljósum framundan. Þegar nær dró var ekki um að villast að
þar var aftur kominn veitingastaðurinn sem var í þann veginn að loka. Þá
var snúið við aftur, en afleggjarinn fannst ekki enn, svo mikið og algert var
náttmyrkrið.
***
Kannski var það hitinn og rakinn sem fóru verst í liðsmenn í norrænu
vopnahléseftirlitssveitunum á Srí Lanka. Eða vonleysið sem blasti við þegar
árin liðu.
Friðareftirlitið hafði þó gengið vonum framar fyrstu árin eftir að tekist
hafði að binda enda á stríðsátökin fyrir tilstilli Norðmanna árið 2002.