Gerðir kirkjuþings - 1994, Side 42

FJÖLSKYLDUÞJÓNUSTA KIRKJUNNAR
Laugavegi 13, 4. hæð, 101 Reykjavík s. 62 36 00
Það má auðveldlega sjá af þessu að ekki skortir verkefnin sem tengjast ráðgjöf,
fræðslu og vinnu með fjölskyldur þessa mikilvægu grunneiningu samfélagsins.
Kirkjan á hiklaust að halda áfram á þessari braut og ryðja nýja braut þar sem þess
er þörf. Vonandi finnst leið til þess að bæta við starfsfólki svo við getum liðsinnt enn
fleirum sem vilja bæta samskipti sín við fjölskyldu sína.
Fjárhagsstaða stofnunarinnar er trygg eins og hún er, en samt var hún rekin með
halla og gengið var á sjóði til að brúa það bil. FÞK hefur notið mikils velvilja
Reykjavíkurborgar er nægir til greiðslu á stórum hluta húsaleigu og verður vonandi
svo áfram. Og stofnaðilar hafa staðið við sinn hlut. Reikningar 1993 sýna að tekjur
voru alls kr. 7.681.839 en gjöld 8.792.161. Tapið varð því rúm ellefu hundruð
þúsund. Allir starfsmenn hér eru nú á launum hjá kirkjunni og breyttist það er ný lög
um kirkjumálasjóð tóku gildi hvað varðar forstöðumann en hann hafði fram að
þessu verið á launum úr ríkissjóði.
“Óskabarn” vex úr arasi.
Við erum enn að þreifa fyrir okkur og höfum fundið að okkur hefur verið treyst fyrir
þessu brautryðjandastarfi. Góð samvinna þeirra sem starfa hér gerir það verk
léttara en ella en slíkt sjálfstæði kallar okkur um leið til mikillar ábyrgðar. Biskup
okkar herra Ólafur Skúlason nefndi það á fundinum með próföstunum að
fjölskylduþjónustan væri “óskabarn” kirkjunnar. Hann eins og prófastarnir glöddust
yfir því hvernig til hefði tekist fram að þessu og það gerum við líka sem hér störfum.
FÞK er enn ung að árum en hefur vaxið úr grasi og er tilbúnari en áður að takast á
við ný verkefni. Um leið finnum við að við verðum öruggari í því sem við erum að
fást við nú þegar.
Svo örugg erum við um framtíðina að við höfum látið útbúa merki sem styrkir ímynd
okkar og auglýsir enn betur en áður starfsemina. Merkið gerði Jóna Sigríður
Þorleifsdóttir auglýsingateiknari og hönnuður. Þar má sjá fjölskyldu, fólk, er helst í
hendur en milli fólksins myndast hjörtu. Merkið er ákaflega táknrænt fyrir allt okkar
starf. Okkar hlutverk er ekki hvað síst að aðstoða fjölskyldur við að glæða kærleika
þeirra innbyrðis. Sú umhyggja birtist þegar fólk tengist tryggðaböndum, helst í
hendur í sátt og samlyndi og vill mæta lífinu sem blasir við því. Sumir koma þó til að
slíta þessi bönd og sjá ekki aðra lausn á sínum vanda. Enn fleiri koma til að efla
kærleikann og styrkja sambandið, .tgauka við gleðina sem gott og heilnæmt
fjölskyldulíf veitir ungum sem öldnum. Megi sú kærleiksþjónusta sem FÞK veitir
með fjölskyldum styrkjast að sama skapi til heilla fyrir börn þessa lands.
Ég vil að lokum nota tækifærið og færa ykkur öllum sem á einhvern hátt tengist FÞK
þakkir fyrir góðan stuðning og hvatningu.
f. h. Fjölskylduþjónustu kirkjunnar,
Þorvaldur Karl Helgason, forstöðumaður.
20.10.1994
37