Tímarit um menntarannsóknir - 01.06.2012, Page 96

96
Í þessari grein er leitast við að varpa ljósi á viðhorf leikskólabarna til þeirra breytinga
sem þau sjá fyrir sér að muni verða þegar þau fara í grunnskólann og þess undirbúnings
undir grunnskólann sem fram fer í leikskólanum. Rannsóknin er hluti af stærri rannsókn
þar sem leitað er eftir sjónarmiðum barna á sitt daglega líf. Þátttakendur voru 32 börn
sem voru í elsta hópnum í tveimur leikskólum í Reykjavík. Gögnum var safnað með
einstaklingsviðtölum sem byggðust á ljósmyndum sem börnin tóku sjálf í leikskólanum.
Tilgangur þess að nota ljósmyndir barnanna í rannsókninni var ekki sá að greina
myndirnar heldur voru þær notaðar sem hvatning og umræðugrundvöllur í viðtölunum.
Fræðilegur grunnur rannsóknarinnar er hugmyndafræði bernskurannsókna þar sem litið
er á bernskuna sem mikilvægt tímabil háð menningu, tíma og samhengi. Jafnframt var
tekið mið af rannsóknum og hugmyndum um tengsl og samfellu milli skólastiganna.
Niðurstöður rannsóknarinnar sýna að börnin litu á upphaf grunnskólagöngunnar sem
mikilvæg tímamót og gerðu ráð fyrir töluverðum breytingum á lífi sínu þegar þau færu
úr leikskólanum í grunnskólann. Flest börnin hlökkuðu til að byrja í grunnskólanum.
Þau greindu frá formlegum undirbúningi undir grunnskólann sem fram fór í leikskól-
anum þar sem megináhersla var lögð á verkefnavinnu til undirbúnings námsgreinum
grunnskólans.
„Þá byrjar kennarinn að láta mann læra“
Leikskólabörn tjá sig um væntingar sínar
og undirbúning undir grunnskólagönguna
Jóhanna Einarsdóttir
Háskóla Íslands, Menntavísindasviði
Ritrýnd grein
Tímarit um menntarannsóknir /
Journal of Educational Research (Iceland) 9, 2012, 96–111
Hagnýtt gildi: Ein stærstu tímamótin í lífi barna eru upphaf grunnskólagöngunnar og hvernig
til tekst getur haft afgerandi áhrif á áframhaldandi skólagöngu þeirra. Þessari grein er ætlað
að varpa ljósi á sjónarmið og væntingar barna til þessara tímamóta og hún á erindi til kennara
í leik- og grunnskólum, stefnumótunaraðila og kennaranema.