Ritið : tímarit Hugvísindastofnunar - 01.05.2017, Blaðsíða 135

134
Það hefði alltaf blundað með honum að takast á hendur langt og
mikið ferðalag. En það kostaði hann þá fórn að hann yrði að fara í
burtu frá Rósu sem hann elskaði meira en morgundaginn og sólina
sjálfa. Hann væri nefnilega knúinn til að fara til Santa Fe og spyrjast
fyrir um konuna sem hann hefði alltaf þráð þótt á því yrði nokkurt
hlé meðan Magdalena lifði. (30)
Og hann segir henni síðan að eitt kvöldið hafi hann heyrt „fyrir sér orð
Magdalenu“ (30) sem hefði hvatt hann til gefa sér og Rósu tíu ár saman
en fara síðan og leita að Rósu Cordovu. Steinunn Inga Óttarsdóttir
segir í gagnrýni um bókina að leit Lenna sé fáránleg og megi „túlka sem
ýkt sorgarviðbrögð eða örvæntingarfulla tilraun til að losna undan oki
Magdalenu.“42 Afstaða hennar er vel skiljanleg þar sem ástæða Lenna
orkar glórulaus ekki síst vegna þess að Rósa hefur þegar misst eitt for-
eldri.43 Þegar Lenni er farinn veltir Rósa líka fyrir sér hvort hann átti sig
ekki á að Rósa Cordova sé orðin gömul kona og hvort hann vilji kannski
vera með gömlum konum.44 vangaveltur Rósu má túlka sem vísbendingar
um fráleita hegðun Lenna en einnig má halda því fram að hún felli hugs-
anir sínar að röngu skema þegar hún hugleiðir hvort Lenni kjósi að vera
með gömlum konum. Hún tekur ekki mið af tímaleysi ævintýrisins – sbr.
Þyrnirós svaf í hundrað ár og vaknaði óbreytt – því Lenni fer og finnur
Rósu Cordovu óbreytta í dóttur hennar, Floru; tíminn hefur í raun ekki
unnið bug á viðfangi ástarinnar, heldur endurnýjað það.
Líklega er afar misjafnt eftir lesendum hverjir veita vangaveltum Rósu
Lennadóttur athygli og hverjir ekki. Í hópviðtalinu kom til dæmis fram
að enginn hafði gefið þeim sérstakan gaum. vera má að einhverjir þeirra
sem lesa söguna sem ástarsögu eftirláti sér svo rækilega að ganga á vit
hinnar fagurfræðilegu blekkingar, að þeir hugsi um heim sögunnar sem
„raunveruleika“. Þess vegna hlaupi þeir yfir heilabrot Rósu sem falla ekki
að hugmyndinni eða skemanu um ástarsögur í „veruleikanum“. Jafnt utan
sögu sem innan væri það þar með úrslitaatriði hvaða skemu eru virk hjá
mönnum/persónum.
42 Steinunn Inga Óttarsdóttir, „Ástin, dauðinn og sannleikurinn“, bls. B 7.
43 við skýringu Steinunnar Ingu má bæta að það hefur eflaust líka áhrif á ákvörðun
Lenna að systir hans, Eva, er fallin frá en hún var nokkurs konar jarðtenging hans;
í það minnsta var það hún sem „bað hann að herða sig upp Rósu vegna sem þrátt
fyrir alla sorg hans þyrfti svo mikið á honum að halda.“ vigdís Grímsdóttir, Frá
ljósi til ljóss, bls. 18.
44 Sjá sama rit, bls. 61–62.
GuðRún stEinÞóRsdóttiR