Ritið : tímarit Hugvísindastofnunar - 01.05.2017, Síða 134

133
undir að lesendur hugsi um ást þeirra á sama hátt og þeir kunna að hugsa
um ást Lenna á Rósu Cordovu. Það er að segja; hindranir geta orðið á
vegi Rósu og Róberts en að lokum muni þau ná saman. Sú hugmynd er
að minnsta kosti bókstaflega borin á borð fyrir lesendur því eftir að Rósa
og Róbert hafa elskast í fyrsta sinn segir um Rósu: „Og þegar þau voru
búin vissi hún að það yrði ekki aftur snúið enda vildi hún það ekki. Hún
var viss og hafði alltaf verið viss. Hún hafði alltaf beðið eftir að fá að elska
hann, dreymt um að elska hann og alltaf elskað hann“ (118). Hefðbundinni
formgerð ástarsögu í bland við orðræðu ástarinnar er því markvisst beitt til
að blekkja lesendur þannig að þeir hrífist af ástinni og sneiði hjá siðferð-
islegum vangaveltum eins og hvort rétt sé að fósturfaðir taki saman við
fósturdóttur sína.
Allar þessar aðferðir sem hér hafa verið taldar upp og reifaðar ýta undir
að lesendur lesi Frá ljósi til ljóss sem ástarsögu og fyrir vikið leiði hjá sér
þjáninguna, sársaukann og söknuðinn sem Rósa upplifir af því að alast upp
án móður og að hluta til án föður; að þeim finnist sjálfsagt að Lenni láti
óraunhæfan draum rætast; og þeir leyfi sér að heillast af ást Róberts og
Rósu og láti af þeim sökum tengsl þeirra liggja á milli hluta.
Allt fyrir ástina
Þegar líða tók á hópviðtalið og allar konurnar höfðu áttað sig betur á sárs-
aukanum og þjáningunni sem Rósa fann fyrir stakk brotthvarf Lenna þær
mest og að hann skyldi ekki vera hreinskilinn varðandi uppruna dóttur
sinnar. Þær töluðu um að hann væri draumóramaður og sjálfselskur og
að leitin hlyti frekar að vera táknræn en raunveruleg þar sem að sú gjörð
að ætla að fara til Nýju Mexíkó að leita að einhverri konu gengi ekki upp.
Þær töldu sumsé að Lenni væri frekar að leita að stóru ástinni og finna
einhvern annan tilgang í lífinu en Rósu litlu. En hver er hin raunverulega
ástæða fyrir ferðalagi Lenna? Ég held að hún sé ekki draumórakennd og
þaðan af síður sjálfselska heldur besta dæmið í sögunni um hvernig hryll-
ingur og fegurð verða eitt. Gjörðina má túlka sem eitt það fallegasta í
sögunni þó áhrif hennar kunni að vera það hræðilegasta, og kenndirnar að
baki henni í huga margra ófyrirgefanlegar.
Lenni er margsaga um hvers vegna hann kýs að halda út í heim en
greina má þrjár ástæður fyrir brotthvarfi hans. Í fyrsta lagi sagði hann
Rósu að:
„EINS OG ÆvINTÝRI“