Skírnir - 01.01.1943, Blaðsíða 151
Skírnir
Davíð konungur
149
honum, að sætar syndir verða að sárum bótum. Æ koma
mein eftir munuð.
Sagan um Batsebu er alkunn, svo að ég hirði ekki að
rekja hana nákvæmlega. Hún gerist skömmu eftir 1000,
meðan Jóab situr um höfuðborg Ammóníta. Konungur
hyggst að komast úr öllum vanda með því að veita Úría
manni Batsebu þaðan heimfararleyfi til Jerúsalem. Úría
þiggur það að vísu og tekur vel vingjöf konungs. En
hvernig sem konungur fer að, fær hann ekki Úría til að
fara heim til konu sinnar, heldur leggst Úría til hvíldar
fyrir dyrum konungshallarinnar hjá öðrum þjónum kon-
ungsins. Er sennilegt, að Úría hafi vitað eða a. m. k.
rennt grun í, hversu komið var og ekki hirt um að firra
Davíð vandræðum. En fyrir konung var það hin mesta
svívirðing, ef hann yrði ber að hórdómsbroti með konu
eins af foringjum sínum, sem væri að heyja stríð fyrir
hann. Þegar þetta ráð Davíðs kemur fyrir ekki að kveðja
Úría heim, þá telur hann sig til knúðan að grípa til ann-
ars ráðs. Hann kemur því svo fyrir, að Úría fellur í stríð-
inu við Ammóníta. Síðan tekur hann Batsebu sér fyrir
konu, svo að hún elur honum barn hans í hjónabandi.
Þannig skyldi breitt yfir hórdómsbrotið. En þjóðin fékk
þó að vita, hvernig í öllu lá, og Natan spámaður vekur
skilning Davíðs á því, að hann hafi drýgt voðalegan glæp.
Hann kveðst hafa mál að kæra fyrir konungi, sem æðsta
dómsvald í landinu ber undir. Hann segir honum frá rík-
um manni, sem hafi slátrað lambi fátæks manns, aleigu
hans. Davíð verður æfareiður og kveður þegar upp dóm
sinn: ,,Svo sannarlega sem Jahve lifir; sá maður, er slíkt
hefir aðhafzt, er dauðasekur". „Þú ert maðurinn“, svar-
ar Natan. „Konu Úría hefir þú tekið þér fyrir konu, en
myrt sjálfan hann með sverði Ammóníta". Svo var einn-
ig dómur þjóðarinnar. Fjöldi manna gat aldrei gleymt
Davíð þetta athæfi, þótt hann iðraðist þess beisklega, og
sízt sumir ættmenn Batsebu. Það er eftirtektarvert, að
einn aðalforingi uppreisnarinnar í landinu gegn Davíð
mörgum árum seinna er afi Batsebu, Akítófel.