Ritröð Guðfræðistofnunar - 01.01.1997, Síða 38

„Sjáið merkið, Kristur kemur, krossins tákn hann ber“
fyrir því að KSF stæði fyrir almennri guðsþjónustu þennan sama dag.
Mótmælti stjórn KSF þessum ráðahag við Stúdentaráð og hafnaði
jafnframt öllu samstarfi við Bræðralag um málið. Niðurstaðan varð sú að
félögin sáu á næstu árum til skiptis um guðsþjónustu þennan dag.17
Þetta ágreiningsmál kom þó ekki í veg fyrir að félögin héldu stundum
opna sameiginlega umræðufundi þar sem tekist var á um ýmis guð-
fræðileg grundvallarviðhorf.18
Erlend tengsl og draumar um mót
Stjórn Kristilegs stúdentafélags reyndi að bregðast við aukinni
samkeppni og vaxandi guðfræðilegri spennu með auknu og þróttmeira
starfi. Mikla þýðingu hafði það fyrir félagið er stríðinu lauk og tengsl
sköpuðust á ný við kristilegu stúdentahreyfinguna á Norðurlöndunum.
Þannig átti Kristilegt stúdentafélag til dæmis fulltrúa á fjórum
kristilegum stúdentamótum sem haldin voru í Danmörku, Noregi og
Svíþjóð sumarið 1946. Eitt þessara móta var haldið í Örebro í Svíþjóð og
sóttu það fimm íslendingar, þar á meðal Jónas Gíslason. Mót þetta var
fyrsta norræna kristilega stúdentamótið á biblíulegum grundvelli frá því
fyrir stríð og voru þátttakendur um átta hundruð.
Um ferð sína á mótið skrifaði Jónas ferðapistil í Kristilegt stúdentablað
sama ár. Ekki leynir sér af skrifum Jónasar hversu sterk reynsla það
var fyrir hann að taka þátt í þessu móti. Sérstaklega hreifst Jónas af sr.
Bo Giertz, sem var einn af aðalræðumönnum mótsins.19 En í lok
ferðapistils síns skrifar Jónas:
Þegar ég var kominn upp í lestina, kvaddi ég vini mína. Nú komu upp í
hug mér minningarnar frá mótinu, hver á fætur annarri, og í hug mér
vaknaði þessi spurning: „Hvenær skyldum við halda slíkt mót heima á
gamla Fróni?"20
Jónas Gíslason var ekki einn um að láta sig dreyma um norrænt
kristilegt stúdentamót á Islandi. Allt frá fyrstu árum félagsins hafði þessi
^ Sjá Fundargerðabók Bræðralags 1945-1949 bls. 73-76 og 105-106.
18 Frá sumum þessara funda er greint allítarlega í fundargerðabókum KSF og
Bræðralags, en fundargerðabækur KSF eru varðveittar í húsi KFUM og KFUK við
Holtaveg.
19 Þess má geta að Bókagerðin Lilja gaf stuttu síðar (1948 og 1951) út bækurnar í grýtta
jörð og Með eigin augum eftir sr. Bo Giertz. Sjálfur þýddi Jónas Ágrip af kristinni
trúfræði eftir sama höfund (1976). Um bókina I grýtta jörð spunnust í Kirkjuritinu og
Víðfórla talsverðar ritdeilur á sínum tíma milli sr. Sigurbjörns Einarssonar sem þýddi
bókina og sr. Benjamíns Kristjánssonar.
20 Kristilegt stúdentablað, XI. árg., 1. des. 1946 bls. 18.
36