Skagfirðingabók - 01.01.1973, Blaðsíða 12

SKAGFIRÐINGABÓK
úti fyrir Stafangri í Noregi, og það taldi Egill vera stýrimanni að
þakka, að allt fór betur en útlit var fyrir, allir björguðust í land. En
nú var íslenzki skólamaðurinn í vanda staddur. Hann hafði haft
lítinn farareyri, var búinn að greiða fargjaldið til Danmerkur og
nú kominn á land í Noregi, en fékk enga endurgreiðslu af fargjald-
inu eða fyrirgreiðslu til að komast á ákvörðunarstaðinn suður á
Fjóni.
Með sama skipi var einn sýslungi Egils. Hann sneri sér til hans
og bað hann um að lána sér það, sem til vantaði, en fékk enga
áheyrn, enda er ekki víst, að sá hafi verið aflögufær. En meðal
farþega var einnig Guðjohnsen kaupmaður á Húsavík. Hann lán-
aði það, sem til þurfti, og þeim greiða gleymdi Egill aldrei. Or-
ugglega hefur hann borgað peningana við fyrsta tækifæri, en
sjálfan drengskapinn, að Guðjohnsen skyldi hjálpa honum al-
ókunnugum í þessum vandræðum, sagðist hann því miður aldrei
hafa fengið tækifæri til að launa sem vert var.
Egill komst nú til Danmerkur og settist þar á skólabekk. Einnig
vann hann á búgarði einum á Fjóni. Hann sagði mér löngu síðar
margt af veru sinni þar ytra. Stundum komst hann í lífsháska fyrir
sakir ókunnugleika, því hann var ekki annað en sveitapiltur norðan
frá Islandi, þekkti ekkert til á þessum stöðvum, en vildi mörgu
kynnast. En það skal tekið fram, að hann forðaðist staði, þar sem
svall og óregla var höfð um hönd og var reglumaður allt sitt líf.
Einu sinni gekk Egill út í skóg sér til skemmtunar í blíðu
veðri, reikaði um í fyrirhyggjuleysi, en hrökk upp af hugsunum
sínum við það, að byssukúla flaug rétt hjá höfði hans. Hann hafði
þá verið kominn inn á svæði, þar sem skotæfingar fóru fram.
Mætti fleira telja, sem bendir til, að hann hafi af ókunnugleika
gengið fulllangt, er hann leitaði sér kynningar eða fræðslu.
I Danmörku mun Egill hafa notið viðurkenningar og trausts
þeirra, sem kynntust honum, fyrir hæfileika og dugnað. Sem dæmi
um það skal ég nefna, að húsbóndi hans á búgarðinum, þar sem
hann vann, vildi að hann settist þar að. Bauðst hann til að kosta Egil
til frekara náms og útvega honum að því loknu framtíðarstarf við
kennslu og leiðbeiningar í búnaði. Danski stórbóndinn átti upp-
10