Tímarit Máls og menningar - 01.11.2012, Side 74

G í s l i M a g n ú s s o n
74 TMM 2012 · 4
LÖGREGLUMENNIRNIR
Það gerðist eitt sinn meðal lögregluþjóna sem gegndu störfum í hinni
svokölluðu óeirðasveit, að þeir efuðust um hvort þeir ynnu starf sitt eins
vel og þeir hugsanlega gætu. Fáar sveitir innan löggæslunnar voru jafn oft
sakaðar um að beita hörku fram úr hófi, og jafnvel hafa það lítinn skilning á
lýðréttindum borgaranna að engu var líkara en að þessir lögreglumenn teldu
að þeir héldu uppi lögum í fasísku ríki.
Á kaffistofunni barst talið að Harrison Ford og því hvernig honum hefði
skilist eftir fyrstu ár sín sem leikari, að hann væri alls ekki nógur góður og tók
sér því hlé til að vinna sem smiður í nokkur ár, og eftir þessa heimspekilegu
útlegð frá hégóma sýndarlistanna sneri hann aftur í kvikmyndabransann og
varð besti leikari í heimi.
„Við gætum gert þetta,“ sagði einn lögreglumaðurinn. „Það er ekkert
offramboð á mönnum sem vilja vinna starfið okkar, við þurfum ekkert að
óttast að vera ekki teknir inn aftur ef við hættum í smá tíma.“
„Já, einmitt,“ sögðu hinir og veltu þessu fyrir sér. „Harrison Ford talaði
alltaf um að smíðastarfið hefði hjálpað honum að ná innri ró og yfirsýn,
það er það sem alltaf er sagt um okkur, að við séum bara strákpjakkar sem
viljum bara hasar og fá að skipa öðrum fyrir. Kannski þurfum við bara að
þroskast aðeins.“
Úr varð að þrír lögregluþjónar sögðu upp störfum og fóru að vinna við
smíðar. Þeir þurftu reyndar að vinna svart enda höfðu þeir engin próf, en
það var svo sem enginn stórskaði af því. Eftir tvö ár sneru tveir þeirra aftur í
lögregluna og þóttu með þægilegustu og öruggustu lögreglumönnum hvort
sem það var á stöðinni eða í ryskingum niðri á torgi, þeir voru aldrei framar
sakaðir um valdníðslu og yfirgang. Sá þriðji hélt áfram að vinna við smíðar,
en þótti alveg einstaklega slæmur smiður.
UM LEIÐIR AÐ MARKMIÐATENGDRI LÍÐAN
(Fyrirlestur á sjálfshjálparþingi – utandagskrársvar við spurningum úr sal)
Markmiðatengd líðan snýst um að setja sér markmið um að líða betur. Þegar
þér líður betur áttu síðan auðveldara með að setja þér enn fleiri markmið.
Jafnan er sumsé; markmið samasem líðan samasem markmið. Þetta er
aðferð sem byggist á kenningum um sjálfmótaða væntingaframgöngu.
Þess vegna er mikilvægt að vita nákvæmlega hversu vel manni á að líða svo
maður geti sett sér rétt og viðeigandi markmið. Það skilur hver maður að ef
sett eru markmið um að líða of vel þá kann það ekki góðri lukku að stýra, því
hvernig má það vera gott að líða of vel? Sömuleiðis ef maður setur sér mark-
mið um að líða ekki nógu vel, þá getur það alls ekki verið fullnægjandi.
Síðan er jafnvel verra ef markmiðin standast ekki, ef sett eru markmið um