Ritið : tímarit Hugvísindastofnunar - 01.01.2010, Side 108

108
KATLA KJARTAnSDÓTTiR
munnlegrar sögu hefur ákveðið að taka viðtöl við fólk í því skyni
að halda til haga upplifun og reynslu Íslendinga af yfirstandandi
atburðum. Við höfum t.d. áhuga á að vita hvernig efnahagslegar
sviptingar undanfarið hafa snert líf fólks og hvernig það hefur
brugðist við þeim. Miðstöðin leitar nú að fólki sem vill deila
reynslu sinni af atburðum undanfarinna vikna. Viðtölin verða
tekin upp í Miðstöð munnlegrar sögu, Þjóðarbókhlöðu, nema
annars sé sérstaklega óskað.7
Þarna kemur fram augljós vilji til að taka þátt í samfélagslegri umræðu í
hinum póstmóderníska anda safnafræða sem áður var nefndur. Sýningin á
Húsavík og söfnun Miðstöðvar munnlegrar sögu miðuðu einnig að því að
virkja sýningargesti sérstaklega til þátttöku og buðu í raun upp á opinbert
rými þar sem fólki gafst kostur á að tjá hug sinn og/eða segja frá reynslu
sinni í tengslum við þessa samtímaviðburði. Á Húsavík létu viðbrögðin
ekki á sér standa. Símhringingar, harðorð tölvubréf og jafnvel nafnlausar
kvartanir bárust sýningarstjórunum, þeim Tinnu Grétarsdóttur og
Sigurjóni Baldri Hafsteinssyni, þar sem fram kom skýr gagnrýni á „upp-
ákomu“ af þessu tagi. „Hvað í andskotanum er þetta??!!“ var ein þeirra
fjölmörgu spurninga sem þau þurftu að svara. Hafa ber í huga að sýning-
arform af þessu tagi í Safnahúsinu á Húsavík (og raunar á landsvísu) er að
sjálfsögðu nokkur nýlunda og mörgum var verulega heitt í hamsi á þessum
tíma, eins og sýningin sýndi reyndar mjög glögglega. Þar birtist m.a.
skopmynd af Davíð Oddsyni í gervi Adolfs Hitlers, og ýmislegt fleira í
þeim dúr, sem á þessum tíma gekk manna á milli í tölvupósti. Einnig var
settur upp sérstakur „skoðanaveggur“ þar sem gestum var gert kleift að tjá
sig og var hann töluvert nýttur.8
Minjasafn Reykjavíkur fór einnig af stað með munasöfnun en óopin-
berlega þó. Samkvæmt Gerði Róbertsdóttur, deildarstjóra varðveisludeild-
ar, voru eingöngu „boð látin út ganga“ og var sú leið valin vegna skorts á
tíma, mannafla og fjármagni til að sinna þessu sem sérstöku átaki. Þá sagði
hún að stefnt væri að því að hafa heldur færri gripi en fleiri – nokkurs
konar úrval og að söfnunin stæði enn yfir. Að hennar sögn hefur töluverðu
7 „Munnlegar heimildir úr fjármálakreppu“, Miðstöð munnlegrar sögu. Vefslóð:
http://2.hi.is/Apps/WebObjects/Hi.woa/wa/dp?detail=1019590&id=1017636.
Sótt 14. september 2009.
8 Símaviðtal við Tinnu Grétarsdóttur, 10. apríl 2010; „Veggspjald sýningarinnar“,
Þín skoðun um – Haltu kjafti og vertu þæg! Vefslóð: http://skodanasyning.blogspot.
com/2009/01/blog-post.html.