Skírnir - 01.01.1974, Blaðsíða 232

Ritdómar
NORRÆN LJÓÐ 1939-1969
Noregur/Danmörk/Svíþjóð/Finnland
Hannes Sigfússon íslenskaði
Heimskringla. Reykjavík 1972
Eins og heiti hennar gefur til kynna er í þessari bók all-rúmgott úrval úr
norrænni nútíma-ljóðagerð í íslenskri þýðingu. Efnishlutföll eru skynsamleg í
bókinni: hún hefst með almennum inngangi, 15 bls, þá koma ljóðin sjálf á
285 bls, en loks eru á 16 bls sumpart stuttar greinar um höfundana og sumpart
efnisyfirlit. Þar er auk heitis þýðingar getið um heiti kvæðis á frummáli, því
miður með nokkrum prentvillum. I hlut hvers lands koma sem sé um það
bil 70 bls, og á þessum 70 bls eru kynnt ljóð 10 höfunda frá hverju landi. í
upphafi er vert að láta aðdáun í ljós á því stórvirki sem Hannes Sigfússon
hefur hér innt af hendi jafnframt gleði sinni yfir því að svo nauðsynleg bók
skuli nú komin út á íslensku. Norræn nútíma-ljóðagerð mun ekki kunn ýkja
mörgum lesendum á Islandi, og svo mikið er víst að tilraunaljóð síðustu 20
ára, eða svo, á norrænum málum eru býsna ólík því sem dagsdaglega er ort á
íslandi. En bókmenntasagan greinir frá mörgum dæmum um heillavænleg
áhrif af þýðingum nýrra bókmennta úr einu máli á annað.
Ljóðasafn eins og þetta innir framar öllu kynningarstarf af hendi, og að
réttu lagi er sú kynning margþætt. I fyrsta lagi kynnir bókin fyrir íslenskum
lesendum norræna höfunda sem vert er að þekkja. Þetta gerist með vali skálda
til þýðingar sem þarf því að vera dæmigert um ljóðagerð í landinu á tíma
bókarinnar. I öðru lagi kynnir bókin strauma og stefnur í norrænni Ijóða-
gerð, sumpart með skáldavalinu en einkum með vali kvæðanna sem þýdd eru.
Helst þarf bókmenntaleg greinargerð að fylgja úrvalinu eins og í formála
Hannesar Sigfússonar. í þriðja lagi kynnir slík bók framandi Ijóðmál og
form á íslensku, sem væntanlega hefur einkum gildi fyrir innlend ljóðskáld.
Og í fjórða og síðasta lagi kynnir bókin bókmenntirnar sem þýtt er úr: Slík
bók á að örva lesandann til að halda lestri áfram og lesa sumpart hin þýddu
Ijóð á frummálinu og sumpart önnur Ijóð sömu höfunda eða annarra frá tíma
bókarinnar.
Það verður að meta eftir hlut hvers lands um sig í Norrænum ljóðum
hvernig Hannesi Sigfússyni hafi tekist þessi tilætlun varðandi fyrsta og þriðja
atriðið. Um síðasttalda atriðið: kynningu norrænna bókmennta umfram þýð-