Uppeldi og menntun - 01.01.2001, Qupperneq 54

5TARFSÁNÆGJA OG STJÓRNUN í LEIKSKÓLUM
komast yfir byrjunarörðugleikana og sagðist hafa beðið ákveðið skipbrot, m.a. vegna
þess að hún einangraðist á deildinni og samstarfsfólkið sniðgekk hana. Hún lýsti
reynslu sinni á eftirfarandi veg:
Eg fór allt of geyst... ég gerði margar skyssur, ég var ekki nógu skýr stjórn-
andi... Svo fór bara að krauma svona óánægja og þetta var bara orðið óþol-
andi ástand ... Einn daginn þá var bara eitthvað lítið atvik ... og þá fór ég
bara að gráta og sagði að ég þyldi þetta ekki lengur og þá sagði einn starfs-
maðurinn ... hún var ekki búin að tala við mig í margar vikur ... að hún væri
óánægð með hvernig ég stjórnaði og þá fór ég beint í það að tala við skóla-
stjórann ... Eg vissi að ég var búin að gera mistök en það réttlætir ekki að
maður sé sniðgenginn og baktalaður ... og lagður í einelti.
Erfiðleikar viðmælenda minna tengdust stjórnun starfsmanna á deildinni en
þær nefndu einnig samstarf við foreldra, foreldraviðtöl og börn með sérþarfir. Þar
sem margir nýútskrifaðir deildarstjórar höfðu byrjað saman í leikskólanum gekk
þeim nokkuð vel því þær gátu borið sig saman og styrkt hver aðra.
En það voru ekki eingöngu óreyndu deildarstjórarnir sem töluðu um skort á hæfni
í stjórnunarstarfinu. Þeir reynslumeiri lýstu því einnig. Þeim fannst erfitt að lyfta sér
yfir starfsmannahópinn sem yfirmenn, taka erfiðar ákvarðanir og segja óþægilega
hluti vegna náinna tengsla við samstarfsfólkið á deildinni. Þegar deildarstjóra fannst
hann skorta stjórnunarhæfni hafði það áhrif á skynjun viðkomandi á árangri.
Stjórnun og starfsumhverfi
Hér á eftir verður greint frá þeim þáttum sem starfsfólk sagði stuðla að eða draga úr
starfsánægju sinni. Sumir þessara þátta áttu fremur við fagfólk, aðrir fremur við leið-
beinendur og enn aðrir við allt starfsfólk.
Umræða um hugsjónir og stefnu, samvinna og áhrif
Það voru fyrst og fremst leikskólakennarar sem töluðu um nauðsyn þess að umræða
færi fram um hugsjónir hvers og eins í tengslum við áherslurnar í leikskólastarfinu
og að stefna leikskólans þyrfti að vera skýr. Þar sem þess háttar umræða fór fram
fannst starfsfólki hún fela í sér ákveðna náms- og þróunarmöguleika. Starfsfólkið
skynjaði sig meðvitaðra og öruggara í starfi, fannst það hafa áhrif og vera fremur við
stjórnvölinn í leikskólastarfinu.
Jafnhliða áherslu á mótun skýrrar stefnu lýsti nánast allt starfsfólk eftir sam-
vinnu deilda um þróun leikskólastarfsins á grundvelli hennar. Einnig lýstu allir
starfshópar og einstaklingar innan leikskólans eftir samvinnu og áhuga á þátttöku
og áhrifum við þróun starfsins.
Hvergi var starfsfólkið alfarið ánægt með hvernig staðið var að samvinnu deilda
um starfið. Ymist talaði starfsfólk um yngri deildina sem „lítinn leikskóla innan leik-
skólans" eða um „marga litla leikskóla" eftir því hvernig staðið var að samvinnunni.
Þrátt fyrir umræður um sameiginlegar áherslur virtist samvinna um þær áherslur
hvergi ná í raun til allra deilda leikskólans. Sumum fannst leikskólastjórinn upp-
teknari af starfsemi eldri deildanna en þeirra yngri.
Ymist báru stjórnendur eða fagfólk ábyrgð á mótun og skipulagningu starfsins,
52