Hlín - 01.01.1951, Qupperneq 14
12
Hlin
voru einnig fjölhæf, þó ekki hefðu þau mikla skólagöngu,
og var því oft fólk á heimili þeirra, sem var að læra til
munns eða handa, og stundum hvorttveggja.
Faðir minn var fæddur að Breiðabólsstaðagerði í Suð-
ursveit í Au.-Skaftafellssýslu (1851). Foreldrar hans voru
Oddný Sveinsdóttir og Jón Steingrímsson. Þau áttu stór-
an barnahóp, 11 börn. Af þeim náðu 8 háum aldri. Faðir
minn dó 1931, þá rúmlega áttræður. Fimm alsystkin lifa
enn, flest á níræðisaldri. — Afi minn dó frá barnahópnum
fremur ungum og varð því faðir minn að fara að heiman
11 ára gamall og sjá fyrir sjer. Það yrði of langt mál að
lýsa bernsku- og æskuárum hans. En jeg vil aðeins segja
það, að aðbúðin var mjög ólík því sem nú gerist. —
Fólkið var samt gott við hann, en fáfræði þeirra tíma náði
þar víst hámarki sínu. Ekki að tala um neina upplýs-
ingu undir fermingu nema kverið. — Þá fluttist faðir
minn í Breiðdal, lenti þar til góðra húsbænda, og fjekk
þar það viðurværi, sem liann þurfti til að ná fullum lík-
amsþroska, og í Breiðdal lærði hann að skrifa og reikna
fljótlega eftir að hann kom þangað. — Hjá síra Magnúsi í
Eydölum var hann frá 1876—78 og þar lærði hann
dönsku. Þá fór hann til Sturlusens, sem var verslunar-
stjóri á Eskifirði. Þar var hann við búðarstörf og leysti
þau vel af hendi. — Sturlusen fjekk því það álit á honum,
að hann væri upplagður fyrir verslunarstörf, hvatti hann
því oft og studdi til að sigla til Kaupmannahafnar á versl-
unarskóla. En faðir minn var ekki gefinn fyrir kaupsýslu.
Hann var því stuttan tíma við verslunarstörf eftir að hann
kom heim, en stundaði fiskveiðar á sumrum og barna-
kenslu á vetrum. En hann kendi fleirum en börnunum,
því hann hafði nokkurskonar unglingaskóla, og kendi
mörgu ungu fólki þar sem hann var. Aðallega mun það
hafa verið skrift, reikningur, íslenska og danska, sem
hann kendi því.
Frá þessum tíma átti hann margar glaðar og góðar end-
urminningar. — Það er líka í fylsta máta ánægjulegt að