Ritið : tímarit Hugvísindastofnunar - 01.01.2021, Side 246

Ann Belford Ulanov
Ótti kristinna við sálarlífið
Ótti við sálarlíf (e. psyche) og óöryggi gagnvart því sem í sálardjúpinu býr eru
algeng fyrirbæri í lífi kristins fólks og innan kristinna stofnana.1 Þetta á bæði
við kristna einstaklinga og kirkjuna sem samfélag. Kristið fólk lítur gjarnan á
sálarlíf sitt sem viðsjárvert fyrirbæri og í stað þess að læra að kljást við krefj-
andi veruleika þess lítur það fram hjá því, m.ö.o. það tortryggir sálarlífið og
reynir að þrýsta því út úr meðvitund sinni. Í háskólum og guðfræðideildum
er líka oft litið á greinar sem fást með beinum hætti við sálarlífið sem fram-
andi hjágreinar guðfræðinnar eða jafnvel sem lúxus fremur en grundvallandi
greinar guðfræða.
Á tímum hagræðingar og niðurskurðar vilja gleymast þau miklu áhrif
sem þessi fræði geta haft á líf alls fólks – ekki síst á líf kristins fólks. Þá vill
gleymast mikilvægi þessara greina í baráttunni við þann sjálfstortímandi ótta
við sálarlífið sem svo oft hrjáir trúað fólk. En markmið okkar er að hjálpa því
að endurheimta tilfinninguna fyrir eigin veru og tilfinninguna fyrir verunni
sem slíkri.
Hugtakið gagnsæi (e. transparency) hjálpar til að skýra tengslin á milli
djúpsálarfræðinnar og kristinnar trúar vegna þess að bæði sviðin finna fyllstu
tjáningu sína í þessu hugtaki. Öll raunveruleg reynsla af lífi sálarinnar birtir
okkur gagnsæi og tilgang Guðs í lífi okkar. Öll einbeitt skoðun á lífi sálarlífs-
1 [Dr. Ann Belford Ulanov er prófessor í geðlæknis- og trúarbragðafræðum við Union
Theological Seminary og kennari við Jung Institute í New York. Hún er höfundur
fjöldamargra bóka á fræðasviði sínu. Ritgerðin er þýðing á ritgerðinni „The Chris-
tian Fear of the Psyche“ í bókinni Picturing God, Eugene: Wipf and Stock, 2001. Í
þýðingunni er „psyche“ þýtt með íslenska hugtakinu sálarlíf en það vísar í alla sálræ-
na virkni hvort sem hún er í einstaklingi, hópi eða í samfélagi. Hugtakið vísar ekki
síst til þeirrar virkni sem ekki verður skilgreind sem hugræn eða atferlisleg, heldur
til þess sem er virkni dulvitundarinnar. – Þýð.]
Ritið
1. tbl. 21. árg. 2021 (217-232)
Þýðing
© 2021 Ritið, tímarit Hug vísinda stofnunar
og höfundur greinarinnar
Útgefandi:
Hugvísinda stofnun Háskóla Íslands,
Sæmundargötu 2, 102 Reykjavík
Birtist á vefnum http://www.ritid.hi.is.
Tengiliður: ritið@hi.is
DOI: 10.33112/ritid.21.1.13
Birt samkvæmt skilmálum
Creative Commons BY (4.0).