Skírnir - 01.01.1956, Page 122
120
Jóhann Gunnar Ólafsson
Skírnir
1720 út af handritum og fleira lausafé úr búi Magnúsar og
Ástríðar, að Páll fékk úr búinu handrit með Sturlunga sögu,
Laxdælu, Eyrbyggju, Vatnsdælu og Grettlu. Sennilega eru
þau einnig í Árnasafni eða Bretasafni eða öðrum söfnum, þó
að þau verði ekki heimfærð til Magnúsar. Einnig fékk Ást-
ríður tvær sögubækur í arkarbroti, og gengu þær til barna
Snæbjörns og Kristínar Magnúsdóttur. Það kynnu að hafa
verið bækur þær, sem Sighvatur Borgfirðingur sá og segir frá
í Prestaævum. Einnig er í skjölum máls Páls Vídalíns, sem
áður getur, nefndar ýmsar bækur, sem enn voru óskiptar í
vörzlum lögmanns. Þar er. getið Sturlunga sögu í folio, sagna
af Hrafnistufeðgum í aflöngu kvarto og í vörzlum Kristínar
Magnúsdóttur á Mýrum 19 sagna á einni bók í folio, sögu
af Karlamagnúsi og nokkrum fleirum í kvarto og einnar
rímnabókar í aflöngu oktavo af Sveini Múkssyni og fleirum
öðrum. Þá var þar einnig getið sögubókar í folio á Miðhús-
um á Reykjanesi. Af þessu sést, að Magnús hefur einnig
safnað rímum.
f lögfræði og sagnfræði hafa varðveitzt 9 handrit. Á þess-
um handritum eru Grágás, Járnsíða, Skýringar á fornyrðum
lögbókar, ritgerð um Stóradóm, Bjarkeyjarréttur, dómar og
heimildarbréf frá árunum 1570—-1620 og vísitatíubækur
biskupanna Vilkins og Gísla. Til þessa flokks hefði raunar
átt að telja biskupasögur þær, er áður getur.
Þá eru til frá Magnúsi riddarasögur og fornaldarsögur á
14 handritum. Eitt handritið er í tveimur bindum, 662 bls.,
skrifað af Magnúsi sjálfum. Hefur það verið nefnt Vigrar-
bók, og eru á því 18 riddarasögur og fornaldarsögur, meðal
annars Hrólfs saga Gautrekssonar, Göngu-Hrólfs saga og Ála-
flekks saga.
Þá er komið frá Magnúsi Postulasöguhandrit á skinni, sem
hann hafði fengið frá Magnúsi Magnússyni sýslumanni á
Eyri. Það er í Árnasafni.
Sálmasöfn Magnúsar eru á 4 handritum, og eru þrjú
þeirra rituð af honum sjálfum. Þá eru til í Árnasafni út-
dráttur Magnúsar úr Þóris rímum háleggs og 3 sendibréf
hans til séra Jóns Jónssonar í Holti.