Tímarit Máls og menningar - 01.05.2012, Síða 128

Á d r e p u r
128 TMM 2012 · 2
sem litir og ljós voru meginviðfangs-
efnið. Árið 1969 tókum við þátt í FÍM
sýningu og vorum fyrst til að sýna lita-
optísk verk hér á landi. Um svipað leyti
uppgötvuðum við leið til að ná fram
áhrifamiklum form- og lithverfum með
því að vinna í þrívídd og nota meðal
annars rendur, strengi og skugga. Lit-
irnir sem verða til í þessum fíngerðum
strúktúrum breytast eftir hreyfingu
áhorfandans og virðast lifa sjálfstæðu
lífi í rými milli hans og flatarins. Við
vorum þau einu sem unnum hér með liti
sem ljós – litaoptík/hreyfilist – þar sem
mild örvun auguns leiðir til hverfulla
sjónhrifa.
Árið 1972 héldum við stóra einkasýn-
ingu Ljós og litir í Norræna húsinu.
Þeirri sýningu var mjög vel tekið; fjöldi
manns sótti hana og þar á meðal margir
listamenn. Björn Th. Björnsson tók við-
tal við okkur sem var sýnt á RÚV (varð-
veitt þar) og mikið var fjallað um sýn-
inguna í dagblöðum. Listrýnir Morgun-
blaðsins (líklegast Hjörleifur Sigurðs-
son) skrifar: „Ég er ekki í neinum vafa
um, að þessi sýning er merkur viðburð-
ur í listalífi okkar, og hér víkka þau
hjónin raunverulega svið myndlistar á
Íslandi í dag.“
Björn Th. heimsótti okkur einnig
þegar hann var að undirbúa bók sína
Aldaslóð (Mál og menning, 1987). Þar
fjallar hann um verk okkar og setur þau
í listfræðilegt samhengi við annað sem
var að gerast á Vesturlöndum.
Þremur árum seinna tókum við þátt í
Listsýningu íslenskra kvenna, einnig í
Norræna húsinu, og tók Aðalsteinn Ing-
ólfsson viðtal við Margréti sem er varð-
veitt hjá RÚV. Við sýndum þar strengja-
verkið Duett sem Listasafn Íslands
keypti.
Við höfum haldið áfram að gera til-
raunir á sviði optískrar listar og eigum
43ja ára listferil að baki. Síðasta stóra
einkasýningin okkar SjónarHorn var í
Listasafni Kópavogs síðla árs 2001 þar
sem við sýndum meðal annars optísk og
kínetísk verk.
Það er dapurlegt að enginn sem stóð
að ritun Listasögunnar var tilbúin að
ræða við okkur og kynna sér þá spenn-
andi gerjun sem átti sér stað í Englandi
og við fluttum með okkur hingað. Lista-
sagan er opinbert rit til fræðslu og
menntunar almennings og æsku lands-
ins og verður eflaust notuð við kennslu í
framtíðinni. En því miður var engin til-
raun gerð til að ná tökum á sögu opt-
ískrar myndlistar í bók sem ætti að vera
heildstætt og áreiðanlegt heimildarrit
um myndlist á Íslandi.