Prestafélagsritið - 01.01.1928, Blaðsíða 32

PresiaféUg.ritiö. M. J.t Rannsóknimar um æfi Jesú. 27
I nítján aldir hafa menn nú verið að reyna að gera sér
grein fyrir persónu Jesú Krists. Öll þau öfl, sem menn ráða
yfir, hafa verið hagnýtt í þessari leit. En svo erfitt hefir þessi
ferð sótzt, að sumir hafa komizt að þeirri niðurstöðu, að þessi
maður hafi aldrei verið til. Dómarnir eru ærið misjafnir.
Þýzki sagnaritarinn Treitschke segir, að hann sé mestur allra
manna, þó að það mál sé skoðað frá sjónarhóli hreinnar vís-
indamensku. Von Hartmann segir aftur á móti, að hann hafi
verið vel gefinn, en svo ómentaður, að það sé lélegt, sem
eftir hann liggi. Oscar Wilde telur hann einhvern mesta snill-
ing, sem uppi hafi verið í skáldahóp, en Max Nordau telur
hann ekki hafa verið nema meðalgreindan mann. Samtíða-
menn hans héldu sumir, að hann væri Guðs sonur, aðrir að
hann væri útsendari djöfulsins, og mætti svo lengi þylja þessa
sögu, að öllum ofbyði.
Sama má segja um dóma þeirra, sem hafa komið auga á
dýrð hans og ágæti. Þeim ber ekki saman um það, í hverju
ágæti hans sé fólgið. Hann er frelsarinn frá ánauð holdsins,
syndarinnar og dauðans; hann er konungurinn Messías; hann
er hinn eilífi Logos, orðið, sem var frá upphafi; hann er ráðs-
maðurinn, sem gefur Pétri lykla himnaríkis; hann er hin ágæta
hetja Hvíti Kristur, sem berst við djöfulinn og illa anda; hann
er kennari manna í dygðum; brúðgumi sálarinnar; fátækling-
urinn, vinur og verndari allra betlimunka og annara smæl-
•ngja; hann er dómarinn strangi, sem réttir hluta þeirra, sem
undirokaðir eru. Hver maður og hver stefna sér þar hug-
sjón sína sem hann er.
Þetta er nú auðvitað gott dæmi þess, hve óskertu valdi
Jesús Kristur hefir haldið um aldirnar. En er hann þá hvað
sem vera vill? Er engin Kristsmynd til, — sönn og rétt og
viss og óhagganleg Kristsmynd? Svona hafa margir spurt og
svona halda menn líklega áfram að spyrja. Menn skapa Krist
í sinni mynd ef svo mætti segja. Einstaklings löngunin dreg-
ur myndina. Svo mæla börn sem vilja. En er ekki hægt að
draga þessa mynd upp eftir hreinum heimildum, beita sögu-