Hugur - 01.01.2012, Side 9

Hugur | 24. ár, 2012 | s. 9–19
Heimspekin er tilraun til að segja
það sem er erfitt að segja
Henry Alexander Henrysson ræðir við
Mikael M. Karlsson
Það er orðin hálfgerð klisja að kalla Mikael M. Karlsson, eða Mike eins og flestir
þekkja hann, einn af feðrum akademískrar heimspeki á Íslandi. En eins og í öllum
góðum klisjum býr í henni sannleikskorn. Heimspekinám á Íslandi undanfarna
áratugi hefði líklega orðið harla frábrugðið því námi sem við þekkjum ef þennan
mann hefði ekki skolað upp á íslenskar strendur á fyrri hluta áttunda áratug-
arins. Mike er jafnaldri helstu meðlima The Rolling Stones og verður sjötugur á
árinu 2013. Það er því löngu kominn tími til að hann segi örlítið af sjálfum sér. Í
eftirfarandi spjalli spyr Henry Alexander Henrysson Mike um heimspekina og
hugðarefnin en ekki síst um lífshlaupið og skoðanirnar.
Jæja Mike, mig langar satt best að segja mest að tala um líf þitt. Ég hef þekkt þig í
næstum tuttugu ár en veit fjarska lítið um þína hagi.
Er líklegt að einhver hafi áhuga á að lesa sér til um þá?
Ég er að minnsta kosti einn þeirra. Það er til ágæt grein um heimspeki þína sem Logi
Gunnarsson skrifaði í tilefni af sextugsafmæli þínu. Mér finnst ég vita meira um heim-
speki þína en þig sjálfan.
Já, Logi Gunnarsson er reyndar mjög vel að sér í þankagangi Mikaels M. Karls-
sonar. Það var góð grein.1
Hver veit nema við ræðum eitthvað af þeim atriðum sem koma fram í greininni. En
það sem ég held að flestir hafi áhuga á að lesa um eru þessar spurningar: Hver ertu og
hvernig stendur á því að Háskóli Íslands hefur notið starfskrafta þinna í öll þessi ár?
Hvar eigum við að byrja?
1 Logi Gunnarsson, „Náttúra og nauðsynleg gildi: Fáein orð um heimspeki Mikaels M. Karlssonar“.
Heimspekimessa – Ritgerðir handa Mikael M. Karlssyni sextugum. Ritstjórar Kristján Kristjánsson
og Logi Gunnarsson. Reykjavík: Háskólaútgáfan, 2003.